結婚9周年紀念

尋日係我同老公結婚9周年既紀念(同時都係拍拖14年紀念),好多人都有d驚訝原來我結左婚咁耐,可能現今既社會好少女仔咁細個結婚(又唔係有左bb)...但呢刻我都無後悔,因為我可以同老公過左8年既二人世界,對好多人黎講算係好長既時間,但老實講真係唔覺過左咁多年~今年多左一個小寶貝,令我倆既婚姻更添樂趣^^



不過今年無特別慶祝,因為老公要返學,所以唯有等佢放學返黎一齊食蛋糕,佢訂左我一直好想食既芒果流沙蛋糕..真係好好味呀!winston睇到眼定定流哂口水,好似好可憐咁..所以我忍唔住俾左一塊麵包超人威化餅佢食,係佢契媽polly買架,估唔到第一次食已經食得好叻,仲津津有味添^v^

雖然今年無咩特別既節目,浪漫既晚餐..但一家三口開開心心咁食蛋糕又係另一種幸福呢~老公仲送左個forever friends bear bear俾我已經好開心,因為呢隻bear bear佢14年前都買左個俾我(用黎追我既,hehe)..所以對我黎講幾有意義,反而我就無時間預備禮物俾老公,又攞仔仔當禮物啦(雖然已經當左好多次)

今年我倆既生活有左好大既轉變,但當中大家都係開心同享受既,宜家我地心目中都係希望仔仔可以健健康康咁成長,一齊加油呀!